प्रहरी कार्यालयको गेटमै दुई पक्षबीच झडप, ६ जना नियन्त्रणमा

कञ्चनपुर, २९ कात्तिक   कञ्चनपुरको भीमदत्त नगरपालिकास्थित वडा प्रहरी कार्यालय महेन्द्रनगरको गेट अगाडि दुई पक्षबीच झैझगडा तथा हातपात भएको छ। घटनामा संलग्न रहेको आरोपमा प्रहरीले ६ जनालाई नियन्त्रणमा लिएको छ। जिल्ला प्रहरी कार्यालय कञ्चनपुरले आइतबार प्रेस विज्ञप्ति जारी गर्दै सामाजिक सञ्जालमा सार्वजनिक भएको झैझगडाको भिडियोबारे जानकारी गराएको हो। प्रहरीका अनुसार गत कात्तिक २६ गते भीमदत्त नगरपालिका–५ निवासी रोशन लुहारलाई सोही स्थानका राजेश लुहार र वडा नम्बर १७ का विशाल कोलीले हातपात तथा झैझगडा गरेको भन्दै प्रहरीमा निवेदन परेको थियो। उक्त निवेदनका सम्बन्धमा आइतबार अपराह्न ४ बजेर १० मिनेटको समयमा दुवै पक्षलाई आवश्यक छलफलका लागि वडा प्रहरी कार्यालय महेन्द्रनगर बोलाइएको थियो। छलफलका लागि आएका दुवै पक्षका व्यक्तिबीच प्रहरी कार्यालयको गेट अगाडि नै विवाद चर्किएर झैझगडा भएको प्रहरीले जनाएको छ। घटनापछि प्रहरीले झैझगडामा संलग्न दुवै पक्षका ६ जनालाई नियन्त्रणमा लिएर आवश्यक अनुसन्धान अघि बढाएको छ। प्रहरीका अनुसार नियन्त्रणमा पर्नेमा भीमदत्त नगरपालिका–५ निवासी ५८ वर्षीय रामबहादुर लुहार, २२ वर्षीय राजेश लुहार, २६ वर्षीय रोहित लुहार, २२ वर्षीय रोशन लुहार, २७ वर्षीया निशा लुहार र भीमदत्त नगरपालिका–१७ निवासी २५ वर्षीय विशाल कोली रहेका छन्। घटनाबारे थप अनुसन्धान भइरहेको जिल्ला प्रहरी कार्यालय कञ्चनपुरले जनाएको छ।