आइतवार, कार्तिक ७, २०७८ | Sunday 24th October 2021
  • होमपेज
  • ‘शिक्षित युवा नै बेरोजगार’
समाचार

‘शिक्षित युवा नै बेरोजगार’

लमजुङ, २७ साउनः प्रमुख सत्तारुढ दल नेपाल कम्युनिष्ट पार्टी (नेकपा) का प्रमुख सचेतक देवप्रसाद गुरुङले शिक्षित युवा नै बेरोजगार बन्दै गएकाप्रति चिन्ता प्रकट गर्नुभएको छ । बेंसीशहरमा आज जिल्ला युवा समितिद्वारा आयोजित २०औँ अन्तरराष्ट्रिय युवा दिवसका अवसरमा शिक्षामा रुपान्तरण, उद्यमशीलता र नवप्रवर्तन विषयक प्रेरणामूलक कार्यक्रमलाई सम्बोधन गर्दै उहाँले शिक्षा उत्पादनमुखी नभएकाले बेरोजगार हुँदा हजारौँ, लाखौँ युवा विदेशिन बाध्य भएका बताउनुभयो ।

उहाँले भन्नुभयो, “उद्योगबिना देशको समृद्धि छैन, यदि मुलुकमा उद्योग प्रशस्त खुलेमा युवाले स्वदेशमा रोजगार पाउने र वैदेशिक रोजगारदेखि संस्कार र संस्कृतिको विकृति बढाउँदै गएका युवालेसमेत रोजगारी प्राप्त गरि देश समृद्र्धतर्फ अघि बढाउन मदत पुग्छ ।” आगामी दिनमा शिक्षामा नैतिक, उत्पादनमुखी, श्रममुखी र उद्योगमुखी शिक्षाको उहाँले आवश्यकता औँल्याउनुभयो ।

जिल्ला समन्वय समितिका अध्यक्ष लोकराज पाण्डेले युवालाई स्वदेशमै रोजगारीको सिर्जना गर्दै बेरोजगार र वैदेशिक रोजगारीमा जानेलाई रोक्न बेलैमा सबै सचेत हुनुपर्ने बताउनुभयो । नगरपालिकाका उपप्रमुख लक्ष्मी अधिकारी, नेपाली काङ्ग्रेसका जिल्ला सभापति भेषबहादुर पौडेल, नेपाल उद्योग व्यवसायी महासङ्घ गण्डकी प्रदेशका सदस्य रामकुमार श्रेष्ठ, नेपाल पत्रकार महासङ्घका कार्यवाहक अध्यक्ष कृष्णबहादुर आले, बेंसीशहर नगर युवा सञ्जालका अध्यक्ष निश्चल पाण्डे लगायतले सरकारले युवाको चाहना र आवश्यकताअनुरुप युवाको क्षेत्रमा काम गर्नुपर्नेमा जोड दिनुभएको थियो । (रासस)

चर्चामा

सम्बन्धित समाचार

भर्खरै