सोमवार, कार्तिक १, २०७८ | Monday 18th October 2021
  • होमपेज
  • वाङ्मय शताब्दी पुरुष जोशी सम्मानित
विविध

वाङ्मय शताब्दी पुरुष जोशी सम्मानित

काठमाडौँ, १० कात्तिकः महाकवि लक्ष्मीप्रसाद देवकोटाको १११औँ जन्मजयन्तीका अवसरमा वाङ्मय शताब्दी पुरुष सत्यमोहन जोशीलाई सम्मान गरिएको छ । नयाँबस्ती युवा क्लबले जोरपाटीस्थित महाकवि देवकोटा उद्यानमा आज आयोजित कार्यक्रममा साहित्यकार कञ्चन पुडासैनीले जोशीलाई रु पाँच हजार ५५५ सहित अभिनन्दनपत्र र दोसल्ला ओढाइ सम्मान गर्नुभएको हो । संस्कृतिविद् जोशीले सांस्कृतिक अन्वेषणमा पुर्याउनुभएको योगदानको कदर गर्दै सांस्कृतिक बाजागाजासहित उहाँलाई सम्मान गरिएको हो ।

कार्यक्रममा गोकर्णेश्वर नगरपालिकाका प्रमुख सन्तोष चालिसेले नगरपालिकाले साहित्यिक क्षेत्रको प्रवद्र्धनका लागि उल्लेखनीय काम गरेको बताउनुभयो । सात साहित्यिक संस्थालाई रु १० लाखका दरले गतिविधि गर्न नगरपालिकाले सहयोग गरेको उहाँले बताउनुभयो । “नगरपालिकामा यसै वर्ष अन्तर्राष्ट्रियस्तरको कवि गोष्ठी गरिँदैछ, त्यसका लागि रु १० लाख विनियोजन गरेका छौँ, कार्यक्रम आगामी पुसमा आयोजना हुँदैछ, सबै साहित्यिक संस्थालाई एकै किसिमको सहयोग गरिएको छ”, उहाँले भन्नुभयो ।

नगरपालिकाको नयाँबस्ती क्लब मात्र ‘बी’ डिभिजनमा पुगेकाले यसका लागि विशेष बजेट विनियोजन गरिएको नगरप्रमुख चालिसेले जानकारी दिनुभयो । हाल क्लबलाई रु १० लाख वार्षिकरूपमा बजेट उपलब्ध गराएको छ । क्लब ‘ए’ डिभिजनमा बढुवा भए वार्षिक रु २० लाख उपलब्ध गराउने उहाँले घोषणा गर्नुभयो ।

कैलाशकुट भवन उत्खनन् गर्न माग

सम्मानित व्यक्तित्व जोशीले वंशावलीमा गोकर्णेश्वरमै सातौँ शताब्दीको अंशुवर्माकालीन कैलाशकुट भवन रहेको उल्लेख भएकाले उत्खनन् गर्नुपर्ने बताउनुभयो । भवनको जग गोकर्णेश्वर महादेव मन्दिर आसपासकै क्षेत्रमा हुन सक्ने उहाँको भनाइ थियो । सो अवसरमा जोशीले महाकवि देवकोटाले घण्टाघरस्थित भाषानुवाद परिषद्को कार्यालयमा बसेर शाकुन्तल महाकाव्य रचना गर्नुभएको बताउनुभयो । शाकुन्तल महाकाव्य रचना गरेवापत महाकवि देवकोटाले त्यसबेला रु ५०० पारिश्रमिक पाएको संस्कृतिविद् जोशीले सुनाउनुभयो । त्यसबेलाको मोहर देवकोटा आफैँले बोकेर जानुभएको आफूले देखेको पनि उहाँले सो अवसरमा जानकारी दिनुभयो । मानवअधिकार तथा शान्ति समाजका सभापति उत्तम पुडासैनीले जोशी विगत र वर्तमान जोड्न युगपुरुष भइकन वैचारिकरूपमा युवाको जस्तो सोच भएको व्यक्तित्व हो भन्नुभयो ।

कार्यक्रममा साहित्यकार पुडासैनी, गोकर्णेश्वर नगरपालिकाका प्रमुख सल्लाहकार दीपक रिसाल, नगरपालिका वडा नं ५ र ६ का वडाध्यक्ष क्रमशः नारायणबहादुर सुवेदी र रमेश अर्याल, नेपाल कम्युनिष्ट पार्टी (नेकपा) का नेता पुण्यप्रसाद चौलागार्इँ, क्लबका अध्यक्ष सुभाष पुडासैनी, उपाध्यक्ष राजकुमार तामाङ, सचिव चन्द्रमणि गौतम, कोषाध्यक्ष राजेन्द्र खनाल, पूर्वअध्यक्ष श्रीबहादुर योगीलगायतले देवकोटाले नेपाली साहित्यमा पुर्याउनुभएको योगदानको चर्चा गर्नुभयो ।

उद्यानमा रहेको देवकोटाको अर्धकदको शालिकमा सो अवसरमा माल्यार्पण गरिएको थियो । कार्यक्रममा कविहरु नवराज पुडासैनी ‘ज्योत्स्ना’, गोपालकृष्ण रिजाल, कविन्द्र पुडासैनी, पवनकुमार सङ्ग्रौलालगायतले महाकवि देवकोटा एवम समसामयिक विषयमा लेखिएको रचना पाठ गर्नुभएको थियो । सो अवसरमा बौद्धिक अपाङ्गता भएका व्यक्तिको हितमा कार्यरत ‘नयाँ जीवन’ नामक संस्थालाई रु पाँच हजार ५५५ सहित सम्मान गरिएको थियो । (रासस)

चर्चामा

सम्बन्धित समाचार

भर्खरै